На 4 ноември, големата сала на Центарот за култура ќе стане место на необична средба меѓу градот што го паметиме и градот што допрва го откриваме. „Полноќни приказни од Офицерскиот дом“, со авторскиот потпис на Дејан Пројковски, е музичко сценски перформанс што ја раскажува историјата на Битола низ светлина, музика и современ сценски израз. За првпат пред битолската публика, едно вакво доживување ќе им даде нова димензија на градските приказни, поврзувајќи го минатото со сензибилитетот на денешниот гледач.
Како изгледа сеќавањето кога станува светлина? Како звучи еден град кога неговите времиња ќе се сретнат на иста сцена? Пројковски отвора простор за возбудливо, визуелно и музички впечатливо читање на Битола. Историјата добива движење, спомените добиваат звук, а познатото станува повторно вредно за откривање. На перформансот ќе му претходи свечената академија со доделување на наградите по повод 4 Ноември, Денот на ослободувањето на Битола. Во рамките на празничната програма „Сите бои на сеќавањето“, Општина Битола ја поврзува почитта кон минатото со современото уметничко творештво.
Градот што го носиме во себе, во доживување што ќе го паметиме.
4 ноември 2026 · 20 часот
Голема сала на НУ Центар за култура Битола.
Еден град-сите негови времиња – една сцена
