Реномираната македонска дизајнерка Стефанија Насеска, ја промовираше својата прва ресорт или ‘cruise’ колекција со која го позиционира својот бренд на едно повиско ниво. Се работи за мала колекција која ја нарече ‘Почетокотʼ затоа што е инспирирана од Пелагонија. За истата употреби природни материјали, како памук, рафија, лен, материјали кои го обележуваат летниот период. А боите кои се употребени се бои инспирирани од процесот на производство на пченицата.
„Сакајќи да го вратам сеќавањето на нашите предци дел од инспирацијата ја црпев и од нашиот фолклор, народната носија, како и од целиот некогашен процес на жетвата која луѓето ја правеле рачно во жешките летни денови. Но сето ова минато го споив со еден модерен израз и модерно толкување, затоа што јас создавам мода, а не театарски костими“, истакнува Насеска.
Родена и израсната во Прилеп од каде како што ни кажа има многу убави спомени, беше доволна причина за инспирација за колекцијата.
„Воедно Пелагонија е и најголемата житница кај нас, а јас го зедов житото како клучен елемент за инспирацијата. Целата оваа моја теорија за почетокот неодамна беше поткрепена со најновите археолоши наоди во тој регион каде што беа откриени и првите фурни за леб во Европа. За мене и житото претставува почеток на се и основа на цивилизацијата. Тоа е една од првите агрокултури кои човекот започнува организирано да ги одгледува, а Пелагонија е токму тоа, еден неоткриен предел во кој живот имало уште во праисторијата за кое ни потврдуваат повеќето локалитети низ котлината, а ако го земеме и фактот дека во Суводол се пронајдени делови мамут кои датираат од пред 10 милиони години тогаш слободно можам да кажам дека Пелагонија е почеток на сѐ“, додава таа.
Меѓутоа пораката која сака да ја испрати е тоа дека ние треба да го чуваме и негуваме нашето приридно богатство, а плодната почва е дар од природата кој мора да се заштити со закон.
„Ние треба да сме бескрајно благодарни за природните убавини и удобства што ни ги подарила мајката Земја. Со модернизацијата, и со развојот на технологијата и желбата за профит, особено во нашата држава човекот започнува да сѐ губи мислејќи дека добива! Плодното земјиште без пардон се користи за монтажа на електро панели, со што за личен интерес ја губиме можноста за производство на храна и стануваме земја зависна од увоз, а таквата земја е земја лесна за манипулација“.
Оваа колекција поради силната порака што ја носи мораше да биде и крунисана со едиторијал фотографии кои спонтано го доловуваат сензибилитетот на облеката. Фотографиите се направени од Ристе Кјандовски во кого во иднина дизајнерката гледа успешен фотограф. Пред неговиот објектив застанаа Јана Ацески, Маја Ацески и Пеце Белевски кои фантастично го одработија својот дел. Одлуката за мешовитиот состав на професионални модели и аматери е направена целно со намера за да и покажеме на јавноста дека инклузијата и диверзитетот имаат посебен сјај и зрачат со позитивна енергија која не нѐ напушти во текот на целиот сет иако температурите беа ненормално високи. За целиот сет да биде вака успешен несебично се погрижи Валентин Трајкоски кој со локалното население од Могила и Чарлија успеа да го организира и обезбедат просторот во Пелагониските полиња во знак на симболичност и енергетска поврзаност на колекцијата. „Почетокот“ премиерно беше прикажана на модниот настан Global Fashion Net, кој секое лето се одржува во Кошице, Словачка.
„Јас како дел од модното семејство на European Fashion Passport, бев претставник од Македонија, а имаше дизајнери скоро од целиот свет. Настанот беше предобро организиран, за што заслуга имаа и Моден Викенд Скопје кои од неодамна се соработници со GFN. Дизајнерите бевме професионално пречекани и угостени, со целосен акцент на нас и многу многу новинарски екипи кои го проследија целиот настан кој пак траеше неколку денови. За Словаците можам д кажам дека се многу убав и културен и срдечен народ и се надевам дека во иднина ќе имам повторно прилика да соработувам со нив“.
