„300 Работи, Триста“ го отвори своето ново издание: вечер посветена на слободата, филмот и новите авторски гласови

Во прекрасна атмосфера на платото пред Офицерскиот дом во Битола, беше отворено новото издание на Фестивалот за литература и аудиовизуелни уметности „300 Работи, Триста“ – фестивал кој повеќе од една деценија создава простор за литературата, филмот, визуелната уметност и новите авторски гласови.На почетокот на вечерта, претседателот на Здружението ЛАТЕРАЛ и основач на фестивалот, Игор Трајковски Фоја, ги поздрави присутните автори, уметници, гости и љубители на уметноста, осврнувајќи се на почетоците на фестивалот пред 14 години, неговиот развој и континуитет.
„Денес, после сите овие години, можам да кажам дека ‘300 Работи, Триста’ не е само фестивал. Тој е процес. Тој е средба меѓу различни генерации, меѓу искусните и оние што допрва го бараат својот глас. И можеби токму затоа неговата најголема вредност не е во бројот на настаните, туку во луѓето и делата што остануваат зад него“, истакна Трајковски Фоја.
Во своето обраќање тој се осврна и на слободата како суштинска вредност на уметничкото создавање, нагласувајќи дека секое дело започнува со слободата на авторот да мисли, да поставува прашања и да создава на свој начин.

Фестивалската вечер беше отворена со документарниот филм „Плочите од Битола 60-ти“, во продукција на ЛАТЕРАЛ – Битола, по сценарио на Илија Талев и во режија на Игор Трајковски. Филмот ја врати публиката кон еден значаен период од битолската културна и музичка меморија, отворајќи ја вечерта со аудиовизуелна приказна длабоко поврзана со градот и неговото минато. По филмската проекција следуваше промоцијата на новото издание на фестивалскиот зборник „Колегиумски записник 013“. Дел од селектираните автори лично ги претставија и прочитаа своите дела пред публиката, давајќи им дополнителен живот и глас на текстовите објавени во зборникот.
Во истиот простор беше поставена и изложба на визуелни дела застапени во „Колегиумски записник 013“, избрани преку овогодишниот јавен конкурс. Така, книжевните текстови, фотографијата, илустрацијата и визуелната уметност се најдоа заедно во еден фестивалски простор, создавајќи непосреден дијалог меѓу зборот и сликата. Отворањето покажа дека „300 Работи, Триста“ и понатаму ја задржува својата основна идеја – да создава простор во кој авторите не се само учесници во програма, туку активни создавачи на фестивалот.
Фестивалот продолжува со својата програма и во следните денови, носејќи нови средби со литературата, филмот, визуелната уметност и современата културна продукција.
„Нека секоја страница биде простор за нова идеја. Нека секоја песна биде глас. Нека секоја фотографија биде сведоштво. Нека секое дело биде чин на слобода.“
„300 Работи, Триста“ продолжува.