Во кино „Манаки“ на КИЦ Битола почна јубилејното петто издание Интернационалниот етнографски филмски фестивал „Илинденски денови“ кое годинава на филмофилите ќе им понуди 42 документарни филмови.
„Создадовме програма која е богата и продуктивна во своето истражување на темите што ги обработуваме. Со голема чувствителност овие филмови на некој начин го креваат превезот врз еколошките, социјалните, културните и човечките превирања, што ги зафаќаат современите општества низ целиот свет. Ова е нивната вистинска сила бидејќи документарецот е непроценлив по тоа што е хибридно дело, точка на контакт меѓу уметноста и истражувањето, меѓу креативниот израз и научното истражување. Несомнено, желбата за пренесување на знаења и вредности се амбиции кои се совпаѓаат со оние на „Илинденски денови“, истакна Тони Гламчевски, селектор на фестивалот.
На свечениот почеток на фестивалот, директорот на НУ Центар култура-Битола, Сашо Илковски нагласи дека Етнографскиот филмски фестивал е значаен дел од „Илинденски денови“ затоа што ја надополнува мисијата на фестивалот да го истражува, да го документира и афирмира нематеријалното културно наследство и преку филмската уметност да создава нови точки на поврзување меѓу различните култури и луѓето.
Во наредните денови Битола ќе биде место каде што документарниот филм ќе раскажува за луѓето, нивните обичаи, идентитети и светови. Приказни од различни континенти, но со исти прашања за тоа кои сме и што оставаме зад себе. Фестивалот беше отворен со краткиот филм „Муралите на Д10С“ на Лучијано Начи (Аргентина/Италија) и долгометражниот „Никаде во светот“ на Ванина Лапа (Италија). Интернационалниот етнографски филмски фестивал и годинава ја потврдува својата улога како една од најзначајните фестивалски точки на „Илинденски денови“ – место каде што филмот не само што ја документира традицијата, туку отвора разговор за светот во кој живееме денес. Фестивалот е поддржан од Агенцијата за филм на Република Македонија, Министерството за култура и туризам, Општина Битола, КИЦ, а се одржува во рамките на БитФест.
Фотографии: Диоген Хаџи Коста Милевски
