Промовиран вториот дел од книгата „Приказните од Широк Сокак“ на Зоран Ѓоргиев

Пред бројна публика во Битола беше промовиран вториот дел од книгата „Приказните од Широк Сокак“ на авторот Зоран Ѓоргиев, петта книга посветена на Битола и нејзиното богато културно и историско наследство.
Книгата е посветена на почитуваниот проф. и хроничар на Битола, Александар Стерјовски, голем вљубеник во градот кој остави значаен белег во зачувувањето на битолската меморија. Рецензент на изданието е Зоран Алтипармаков, дипломиран инженер архитект и советник конзерватор во Одделот за заштита на културното наследство при НУ Завод и музеј – Битола.
„Приказните од Широк Сокак 2“ содржи 16 вистински приказни кои низ повеќегодишно истражување ги оживуваат луѓето, семејствата, куќите, хотелите, кафаните и објектите што оставиле трага во историјата на Битола. Во книгата се вклучени голем број ретки и досега необјавени фотографии од приватни семејни албуми, архивски материјали и лични сведоштва, кои дополнително ја надополнуваат приказната за едно време и еден град.
Низ страниците читателите ќе се сретнат со познати битолски семејства, лекари, трговци, уметници и личности кои биле дел од секојдневниот живот на Широк Сокак, но и со објекти кои денес повеќе не постојат, а некогаш биле препознатлив дел од градската слика. Инспирацијата за книгата произлегува од желбата да се сочуваат приказните кои полека исчезнуваат со времето, а кои ја создавале душата на Битола. Широк Сокак не е само улица, туку жив сведок на генерации битолчани, нивните радости, успеси, љубови и животни судбини.
Големиот интерес кај читателите уште еднаш потврди дека ваквите изданија претставуваат важен дел од колективната меморија на градот и мост меѓу минатото и идните генерации.