Што се случува кога два силни космоси ќе се судрат во тесниот простор помеѓу љубовта и ништожноста? Ова прашање се поставува во претставата „Нирвана“ која во рамките на Битолското културно лето беше изведена во Интимниот театар. Работена по мотиви од истоимената пиеса на Константин Илиев во режија на Валентин Дамчевски, а во изведба на Валентин и Вероника Ефтимова. Аудио и дизајн на светло: Александар Талевски, кореографија: Борис Богдановски и Никита Ангеловски.
Претставата „Нирвана“ не е едноставна биографска приказна за поетот Пејо Јаворов и неговата муза Лора Каравелова. Ова е висок, психолошки трилер и метафизички дуел на двајца луѓе кои се одбиваат да живеат во баналноста на светот. Во една клаустрофобична ноќ, пред звукот на судбоносниот истрел, тие ги соголуваат своите суети, ги палат своите идеали и ја бараат апсолутната вистина — онаа која се наоѓа само на границата помеѓу Еросот и Танатосот.
„Нирвана“ е камерна претстава на тишината, каде што секој изговорен збор е куршум, а секој поглед е чекор поблиску до вечноста. Претстава за судирот меѓу мажот и жената, меѓу уметникот и реалноста, меѓу минливото и бесмртното. Премиерно беше изведена на 21 јуни во Битола, а со оваа претстава беше отворено и годинешното издание на „Крушево будно“.
Фото Сашо Ставрев
