Симон Трпчески, светски познатиот македонски класичен пијанист, настапи на Античкиот Театар Хераклеа во Битола. На настанот присуствуваше и градоначалникот на Општина Битола Тони Коњановски, како и претседателката на Македонија Гордана Сиљановска Давкова, која воодушевена од концертот истакна:
„Вчеравечер, на волшебен начин, дождот престана, небото се отвори, ветрот стивна и ѕвездите осамнаа над Античкиот театар Хераклеа Линкестис којшто ги вдоми маестро Симон Трпчески со неговите маестрални музички пријатели и привилегираната публика, желна и жедна за музички чуда. Симон, уште еднаш покажа и докажа дека не е само најдобриот македонски пијанист на сите времиња и еден од најмаркантните пијанисти во светот, туку и харизматична личност којашто сака и умее да комуницира во текот на концертот со музичарите на сцената, но и со слушателите, креирајќи топла, пријатна атмосфера. Првиот дел од репертоарот нè врати во раскошот на класичните музички приказни, компонирани во наплив на различни чувства и расположенија и изразени низ различни ритми. Во вториот дел, македонското музичко наследство доби ново, современо руво, низ дел од проектот „Македонисимо“, во којшто автентичните и препознатливи македонските ора и песни, преку новите аранжмани добија современ музички израз“.
Да се ужива во магијата на Трпчески и неговите музички пријатели во Хераклеа, за претседателката, од уметност на неможното, вчеравечер стана уметност на можното: музичките волшебници го разбудија древниот антички амбиент и ги смирија облаците.
„Сѐ уште под влијание на синоќешната импресија, со задоволство го очекувам концертот по повод десетгодишнината од „Македонисимо“, по деценијата во која, на крилјата на музиката, македонската музичка традиција го пропатува светот, претставувана од врвни културни амбасадори“.
