Не секој фестивал започнува со голема сцена и силни засилувачи. Некои започнуваат со тишина, со зборови што се слушаат внимателно и со беспрекорни вокали низ музика. Токму така започна јубилејното, 25. издание на „Битола Отворен Град“. Во интимната атмосфера на кафе бар „Тигре“, фестивалот им приреди посебна вечер на своите најголеми пријатели, соработници и поддржувачи … луѓето кои во изминатите две и пол децении беа дел од приказната што го изгради еден од најзначајните урбани културни фестивали во земјата.
Главниот музички момент на вечерта беше концертот на Пијан Славеј, придружуван од топлите и впечатливи вокали на Добрила Грашеска. Наместо класичен концерт, публиката доби музичка исповед. Песни што повеќе се раскажуваат отколку што се изведуваат, нежни аранжмани, искрени стихови и атмосфера во која секој тон звучеше како разговор меѓу стари пријатели. Во вечер исполнета со емоции, насмевки и сеќавања, организаторите симболично им се заблагодарија на сите што во текот на изминатите 25 години биле дел од фестивалот – институции, партнери, спонзори, уметници, медиуми, волонтери и публика. Затоа што фестивалите не ги создаваат само програмите. Ги создаваат луѓето што веруваат во нив, година по година.
Со чаша вино од Тиквеш винарија, добра музика и многу разговори, вечерта беше потсетник дека „Битола Отворен Град“ отсекогаш бил повеќе од фестивалска програма. Тој е заедница, генерациска меморија и место каде што пријателствата траат исто толку долго колку и песните што остануваат со нас. Со оваа лирска и исклучително топла вечер, фестивалот го означи почетокот на своето јубилејно издание, најавувајќи уште четири дена исполнети со концерти, изложби, диџеј сетови, улична уметност и културни случувања што повторно ќе ја претворат Битола во град што живее на улица – град што повторно е отворен.
фотограф: Диоген Хаџи Коста Милевски
