Учениците на Државното музичко училиште од Битола се сретнаа со претседателката на Република Македонија, проф. д-р Гордана Сиљановска-Давкова, како дел од талентираните ученици кои годинава ја претставуваа нашата држава на меѓународни научни олимпијади и престижни ученички натпревари. Од Државното музичко училиште беа: Лина Николеска, Емануел Петрески и Илија Неделковски, кои со својот талент, посветеност и успех се достоен пример за младите кои ја претставуваат Македонија.
„За нас, секој успех на нашите ученици е повеќе од награда — тој е потврда дека трудот, дисциплината и љубовта кон музиката создаваат резултати кои се препознаваат и надвор од границите на нашата држава. Веруваме дека талентираните ученици заслужуваат поддршка, можности и услови во кои ќе можат целосно да ги развиваат своите потенцијали. Честитки за Лина, Емануел и Илија.Продолжете храбро да сонувате, да работите и да ја претставувате нашата музика со гордост“, изјавуваат од Државното музичко училиште.
Средбата се одржа по повод 8 Септември, Денот на македонската независност, а заедно со претседателката беше и министерката за образование и наука, Весна Јаневска.
„Опколена со десетици ученици, искажав задоволство од нивното присуство и гордост што земјава има компетитивни умни млади во толкав број и со толку златни, сребрени и бронзени медали во математика, физика, хемија, информатика. Говорејќи за новите технологии и за вештачката интелигенција, укажав и на опасностите, покрај предностите, како и на важноста на емоционалната интелигенција на човекот. За мене, нема подобар ден за оддавање признание и изразување благодарност за нивните успешни натпревари, како сигурен доказ дека во науката, образованието и културата Давид може да го победи Голијат. Им посакав уште многу награди, но и водечки позиции во земјава еден ден, како предуслов за општествен прогрес“, истакна претседателката Сиљановска-Давкова на средбата.
Ученици на Државното музичко училиште на средба со претседателката на Република Македонија
