Balkan Heritage Cultural Center со гордост го најавува своето прво музичко издание под сопствена дискографска куќа, антологискиот албум „Македонија“ во изведба на унгарското дуо BudaPesme. Проектот претставува значаен исчекор во зачувувањето и промоцијата на богатото фолклорно наследство на Македонија, обединувајќи ги врвната изведба на традиционалниот мелос со визуелна естетика од светска класа. Албумот официјално ќе биде објавен и пуштен во продажба на 15 јули 2026 година и ќе биде достапен и во дигитален формат и на винил.
Зад името BudaPesme стои дуото од Будимпешта, составено од Вероника Варга и Бенедек Рети, кои се споени од заедничката страст кон автентичната и емотивна македонска и балканска музика. 
Главен столб, иницијатор и извршен продуцент на овој обемен музички проект е Златко Панзов. Како културен менаџер, организатор на манифестацијата „Денови на македонска култура во Будимпешта“, преведувач на унгарска книжевност на македонски јазик со повеќе од четириесет објавени дела и лектор по македонски јазик на престижниот Универзитет ЕЛТЕ во Будимпешта, Панзов е долгогодишен мост меѓу македонската и унгарската култура. Како носител и реализатор на проектот „Македонија“, тој ги надгледуваше сите фази на продукцијата: од првичниот концепт, преку изборот на репертоарот, па сè до финалното оживување на грамофонска плоча. Посебна уметничка тежина на ова издание му дава учеството на три еминентни имиња и виртуози на македонската музичка сцена: Наум Петрески како еден од највпечатливите вокали во историјата на македонската песна, синоним за македонскиот мелос и чувар на изворната традиција, проф. д-р Горанчо Ангелов, врвен виртуоз на гајда, амбасадор на македонското културно наследство и долгогодишен професор кој ги пренесува тајните на фолклорот на новите генерации, Мишел Трајковски, еден од најталентираните современи хармоникаши, познат по уникатниот спој на македонскиот фолклор со џез и етно-елементи.
Покрај исклучителниот аудио-материјал снимен во професионално студио XL Момироски во Скопје, албумот се одликува и со извонредна визуелна компонента. Корицата и дизајнот на албумот се внимателно осмислени за визуелно да го рефлектираат длабокиот емотивен карактер на песните и македонската традиција правејќи го винилното издание вистинско уметничко парче за колекционерите. Фотографијата на корицата е на Јелена Белиќ, а графичкото решение на Богларка Фодор. Проектот е реализиран со поддршка на Министерството за култура и туризам на Р. Македонија и целосна реализација на Balkan Heritage Cultural Center, чија што мисија е негувањето, зачувувањето и достоинствената меѓународна промоција на балканската традиција.
Линк за албумот: https://distrokid.com/hyperfollow/budapesme/makedonija
