Премиерата на документарниот филм „Приказната за Силјан“ ја претвори големата сала на Центарот за култура во простор на тишина, емоција и восхит – таму каде што приказните не се само гледаат, туку се чувствуваат. Битола, филмски град со традиција изградена низ фестивалот „Браќа Манаки“, повторно беше сцена на средба меѓу уметноста и публиката која знае да препознае вистинска вредност.
Филмот на Тамара Котевска, кој зад себе има импресивен светски пат – од Венецискиот филмски фестивал, преку Торонто, Чикаго, до National Geographic Documentary Films – ја раскажа својата приказна токму пред битолската публика. „Приказната за Силјан“ не е само филм. Тоа е тивка, автентична и универзална приказна за човекот, природата и врската што ги надминува границите на јазикот и времето.
По проекцијата, разговорот со продуцентот Јорданчо Петковски, кој го водеше драматургот Билјана Крајчевска, отвори нови перспективи за филмот и неговото создавање – потсетувајќи дека вистинските приказни продолжуваат и по одјавната шпица.
Фото: Диоген Хаџи Коста Милевски
