Долгометражниот игран филм „17“, дебитантско остварување на режисерката Косара Митиќ, е номиниран во категоријата Европско откритие – Награда ФИПРЕСЦИ (European Discovery – Prix FIPRESCI) на 39. Европски филмски награди. Наградата, која се доделува во соработка со Меѓународната федерација на филмски критичари (ФИПРЕСЦИ), ги истакнува новите европски авторски гласови. Номинацијата е значајно признание за режисерката и целата екипа, како и за македонската кинематографија. По светската премиера на Берлинале, наградите на фестивалите во Ерусалим и Сараево и македонската премиера, „17“ го продолжува своето меѓународно претставување. Во следниот период филмот ќе биде претставен пред членовите на Европската филмска академија преку специјални проекции и презентации. Свеченото доделување на наградите ќе се одржи на 16 јануари 2027 година во Атина. Со оваа европска номинација и статусот на официјален македонски кандидат за Оскар, филмот „17“ ја потврдува својата исклучителна уметничка вредност, истовремено служејќи како вистински амбасадор на новата генерација македонски авторки на меѓународната филмска сцена. Филмот е во продукција на „Црна Мачка Продукција“, реализиран и со финансиска поддршка од Агенцијата за филм на Македонија.
Честитки до Косара Митиќ и целата авторска, актерска и продукциска екипа за ова значајно европско признание.
„17“ на Косара Митиќ номиниран за Европските филмски награди
