Националната опера и балет во Скопје беше домаќин на изложбата „Carra,“ новото дело на уметникот Бојан Ковски. Изложбата беше вистински спектакл што обедини уметнички ентузијасти и љубители на културата, сплотени во почитта кон иконата Рафаела Кара. Настанот беше магичен, преполн со енергија и инспирација, при што публиката беше поканета на визуелно и емотивно патување преку живи уметнички инсталации кои го славеа нејзиниот дух.
Ковски преку „Carra“ ја истражува идејата за телото како живо платно, кое станува средство за изразување на емоции, ставови и естетски идеали. Во оваа изложба, беа претставени 12 body-art инсталации, секоја со уникатен визуелен идентитет, кои на 15 македонски модели раскажаа своја приказна: Каљтрина Круезиу, Ведрана Ѓорѓевиќ, Александар Динев, Ангелина Китановска, Миа Араби, Антонија Гиговска, Даниел Николовски, Иван Ајнштајн, Никита Сабот, Еха Арт, Арѓенд Ѓиѓа, Стефан Стефановски, Катерина Попева, Пиксел. 
Особено впечатлив момент беше финалната изведба, кога пред очите на присутните се создаде уметничко дело на последниот модел, носејќи го целиот простор во директна комуникација меѓу уметноста и публиката. Настанот беше богат со визуелни и емоционални слоеви, комбинирајќи ги уметноста на телото и културното наследство на Кара со теми на слобода и индивидуалност. Магијата на уметноста не завршува со телото. Напротив, секое дело беше овековечено од 12 фотографи, кои преку своите објективи го пренесоа уникатниот светоглед на Ковски и неговите инсталации. Фотографите како Бојан Стоилковски, Ани и Дими, Зоран Стојановски Зонде, Стефан Рајхл, Жарко Чулик, Горан Поповски, Александар Врзалски, Филип Пашоски, Богдан Глишик, Амел Амед, Антонио Станков, Анонимен автор, создаваат визии кои го доловуваат мистичниот танц помеѓу уметноста и телото, помеѓу формата и суштината. Секое фотографирано дело е бескрајно слоевито, со едноставен но длабок приказ на телесната експресија и креативниот импулс.
Во целокупниот визуелен израз, важен дел се и фризурите кои ја комплетираат уметничката инсталација. Врвни фризери Зоран Шурбевски, Срeтен Костиќ, Октај Сејди, Елена Николовска, Кека Ф. Махмути, Даниел Николовски, Студио „Диор“, креираа фризури кои се во совршена хармонија со телесната уметност, што на моделите им дава завршен изглед достоен на оваа изложба. Нивната креативност и елеганција ја истакнаа убавината и оригиналноста на секој од моделите, додавајќи нови слоеви на уметничкиот израз. „Carra“ е повеќе од изложба – тоа е покана за дијалог помеѓу минатото и сегашноста, помеѓу телото и духот, каде секој гест носи порака, а секоја боја – емоција. Ковски нè води низ прашалници за идентитетот и слободата, за моќта на уметноста да го пренесе она што зборовите не можат да доловат. Телото станува медиум на комуникација, симбол на универзалниот јазик кој сите можеме да го разбереме.
Вечерта беше дополнително збогатена со DJ сетот на Flooder и Martin, како и со премиерната изведба на новата песна „Жена“ од Антонија Гиговска, која донесе уште еден емоционален слој на настанот. Изложбата CARRA ја претстави уметноста и музиката на начин што ги поврза минатото и сегашноста во незаборавен дијалог, инспирирајќи ги сите присутни и потсетувајќи на моќта на уметноста и нејзината способност да ги обедини луѓето. Приказната на CARRA продолжува – утре, на истата локација, на матине од 12 до 15 часот. Присутните ќе имаат можност да уживаат во одличен диџеј сет, освежителни пијалаци и можност за неформално дружење со уметникот Бојан Ковски.
