Синоќа, Битола уште еднаш потврди дека живее за филмот.
Премиерата на комедијата „Свадба “ беше распродадена, а салата исполнета со над 800 гледачи – публика која ужива во добар филм и добра смеа. Смеење, аплаузи и полна сала – атмосфера која покажува дека киното во Битола не е само проекција, туку вистински културен настан и заедничко доживување. Битола гледа филм. Битола живее филм.
Филмот „Свадба“, во Битола ќе биде прикажан и на 6 ти и 7-ми февруари во Центарот за култура, но и на 7 -ми февруари, од 20 часот, во Кино Манаки. Ова не е само филм – ова е апсолутен рекордер кој ги собори сите досегашни бројки на гледаност во регионот, надминувајќи ги дури и најголемите холивудски хитови. Фантастичната регионална екипа, како и приказната со која многумина можат да се идентификуваат, го ставија овој филм на самиот врв на интересот: Драган Бјелогрлиќ, Рене Биторајац, Весна Тривалиќ, Марко Грабеж, Линда Бегоња, Анџелка Стевиќ Жугиќ, Роко Сикавица, Ника Грбеља.
Филмот донесе мешавина од здрав хумор, препознатливи животни ситуации и ја води публиката низ приказна што балансира помеѓу топла семејна атмосфера и неочекуван меѓународен инцидент. Го поставува прашањето – дали љубовта може да ги надмине стереотипите, обичаите и родителските планови – и одговара на него на урнебесен, брз и непредвидлив начин.Во центарот на оваа антиромантична комедија се две богати семејства – едното од Загреб, другото од Белград – чиј син и ќерка се заљубуваат далеку од своите домови. Непланираната бременост го забрзува запознавањето на родителите, додека свадбата што мора да остане строга тајна станува повод за лавина од комични, но и напнати ситуации што брзо излегуваат од контрола. Резултатот е експлозивна комбинација од смеа, напнатост и препознатливата балканска „топлина“. Креативниот тим го сочинуваат режисерот и сценарист Игор Шереги, директорот на фотографија Томислав Сутлар, монтажерката Леа Милета, сценографката Јана Пјацун, костимографката Паула Чуле, дизајнерот на звук Иван Желиќ и шминкерката Сњежана Горуп, кои заедно носат автентична приказна во која сатирата вешто се испреплетува со реалноста.
Фото: Диоген Хаџи Коста Милевски
