Во прекрасниот амбиент на НУ Универзитетската библиотека „Св. Климент Охридски“ – Битола, се одржа промоцијата на поетската збирка „Елисиско ехо: Поезијата на меморијата на слободата“ од Игор Трајковски-Фоја. Настанот привлече голем број љубители на поезијата, културни работници и граѓани, кои имаа можност да се запознаат со длабоките и инспиративни стихови на авторот.
Промотори на книгата беа: м-р Емилија Стефановска-Давкова, директорка на НУУБ „Св.Климент Охридски“ – Битола, Гордана Такец и Владо Ѓорески.Тие ја истакнаа вредноста на оваа збирка како сведоштво за борбата за слобода, индивидуалната и колективната меморија, како и емоционалната длабочина што ја носат стиховите на Трајковски.
Делото „Елисиско ехо: Поезијата на меморијата на слободата“ од авторот Игор Трајковски – Фоја претставува моќна современа поезија што ја рефлектира суровата реалност на нашето време. Оваа збирка инспирира со својот повик за слобода на мислата и човечноста, започнувајќи од предизвиците на пандемијата COVID-19, па сè до сите немили настани што го обликуваат нашиот современ свет. Авторот ја испраќа пораката дека човекот, со својата висока свест и интелигенција, може да го победи злото, а неговата поема „Сирачето што спиеше на голата прашина“ (L’orfano che dormiva sulla nuda polvere) доби меѓународно признание во Рим, Италија.
Особено значајно е што директорката на НУУБ „Св. Климент Охридски“ – Битола, м-р Емилија Стефановска-Давкова, беше не само промотор на оваа збирка, туку и нејзин преведувач, со што ѝ даде уште поголема културна и книжевна тежина. Настанот беше дел од одбележувањето на 80-годишнината на НУУБ „Св. Климент Охридски“ – Битола, уште една потврда за значајната улога на библиотеките како чувари на културното наследство.
За музичата изведба се погрижи Славко Спировски Слав.
