“My name is MEDEJA” е насловот на најновата премиера во Битолскиот театар, во режија на Себастијан Хорват која е закажана за 28.09 во 20 часот.
Хорват е еден од најплодните режисери во Словенија. Добитник е на скоро сите значајни и најголеми награди во Словенија и пошироко.
„My name is Medeja“ e претстава за женската моќ. Главната хероина, економска мигрантка од Балканот во Швајцарија, вклештена е помеѓу немилосрдната и безлична бирократија, од една страна, и расипаноста на поранешниот маж, од друга. Медеја се бори, но секој чекор што ќе го направи како да ја турка сѐ подлабоко кон дното и соочувањето со поразот. Во моментот на целосна немоќ, таа сепак пронаоѓа надеж, но надвор од категориите во кои се движела дотогаш (митска омнипотенција/тотална немоќ) – откривајќи дека вистинската сила секогаш се наоѓа во односот со другите. Твојата болка не е само твоја, исто како што и твојата борба не е само твоја.
Драматург на претставата е Милан Рамшак Марковиќ, српски сценарист и сценски изведувач.
Драго Ивануша е името кое стои зад музиката на најновата премиера. Тој е композитор на филмска и театарска музика, пијанист и хармоникаш. Тој е еден од најактивните словенечки композитори.
Во претставата играат: Илина Чоревска, Огнен Дранговски, Катерина Аневска – Дранговска, Викторија Степановска – Јанкуловска, Јулијана Мирчевска – Мавровска, Иван Јерчиќ, Здравко Стојмиров, Соња Михајлова, Васко Мавровски, Сандра Грибовска – Илиевска, Анастазија Христовска, Никола Стефанов, Кристијан Танчевски.
Сценограф е Валентин Светозарев, костимограф Андреј Ѓоргиевски, асистент на драматургија и режија Брина Јенчек, светло – мајстор Игор Мицевски, тон – мајстор Александар Димовски, инспициент Димитар Михајловски, суфлер Мирјана Христовска. Превод: Оливера Павловиќ, превод на германски и консултант: Симона Монавчева.
