Во времето на фестивали кога традицијата оживува низ игра, песна и обред, пристигнува вечер што не припаѓа само на музиката, туку и на душата. Зарина Првасевда не е само глас – таа е медиум. Глас кој не пее само за љубовта и тагата, туку за архетипот и заборавениот глас на жената, на земјата, на тишината. Нејзиниот пристап кон изведбата е истражувачки и длабоко етнографски: таа копа низ слоевите на колективната меморија, низ изворните песни и нивната симболика, барајќи не само мелодија, туку и смисла.
На нејзините концерти, гласот станува ритуал, а публиката за миг ја дели истата вибрација: на изгубени обичаи, недоизговорени зборови и звуци што го премостуваат времето. Концертот „Патување низ ехото на предците“ е дел од концептот на Зарина за музика која се преживува. На сцената, таа ги повикува духовите на минатото, не како сенки, туку како учесници во сегашноста. Песните што ги изведува често се изворни, забележани низ етнолошки записи, полупознати или речиси исчезнати, кои таа ги прераскажува низ нова, чувствителна интерпретација. Не со цел да ги “осовремени”, туку да ги разбере и оживее.
На 27 јули, не ве каниме само на концерт, туку на обредно музичко доживување, што ќе нè поведе низ колективниот глас на жените, на природата, на нашите мајки и нивните мајки.
Затоа што ехото на предците не престанува да зборува. Треба само да застанеме и да го слушнеме. Концертот е со почеток од 20 часот на Платото на Офицерскиот дом.
Влезот е слободен. Душата – отворена.
Фотографија на Татјана Ранташа.
