Во организација на прифатилиштето „Хачико“ од Битола, беше одбележан Светскиот ден на бездомните животни со топол и полн со љубов настан. Под ведро небо и во весела атмосфера, се собраа голем број активисти, волонтери и љубители на животните заедно со насмеани ученици и средношколци.
Младите имаа прекрасна можност да се запознаат и дружат со дел од штитениците на прифатилиштето кои ја почувствуваа грижата и топлината на човечкото срце. Освен игра и гушкање, учениците одблиску дознаа што значи да се биде активист и волонтер, и колку малите дела на добрина можат да направат голема разлика во животот на овие животни.
„Овие моменти нè потсетија дека секое животно заслужува љубов, топол дом и сигурност. Дури и една прошетка, насмевка или гушкање може да значи свет за нив. Ве охрабруваме сите што чувствувате љубов кон животните да се приклучите – како волонтери, донатори или едноставно со поддршка и споделување на приказните на овие мали херои. Заедно можеме да направиме многу за нив, чекор по чекор, шепа по шепа“, истакнаа од Хачико.
Голема благодарност прифатилиштето упати и до Petplus Macedonia кои верно ги следат и помагаат на вакви организирани настани и во секојдневната работа и грижа.
„Нашите штитеници се среќни и се радуваат на секоја ваша донација. Во оваа прилика уште еднаш сакаме да упатиме голема благодарност до оние кои се грижат за здравјето и за цел хуманиот третман и здравствена заштита на нашите бездомни кучиња – докторите од ветеринарните амбуланти:Др.Чупона, Буневски клиника, Филипов клиника и ветеринарна амбуланта Проветалек“.
