Вчера во Europe House Bitola, се одржа незаборавен Европски настан за раскажување приказни „Sasas Jekhvar Jekh – Некогаш… и сега“! Истиот е дел од Еразмус+ проектот и собра раскажувачи, истражувачи и културни ентузијасти од Македонија, Германија, Бугарија, Грција, Унгарија, Романија, Србија и Турција. Преку традиционални ромски бајки, дискусии и презентации, се прослави богатото културно значење и значењето на усното предание.
На настанот присутните имаа можност да слушаат најистакнати говорници кои ги поделија своите знаења, искуства и инспирации. Фатма Бајрам Аземовска – советник библиотекар, НУУБ „Св. Климент Охридски“ – Битола, ја отвори церемонијата и ги поздрави присутните, истакнувајќи ја важноста на овој проект за зачувување на ромската култура и бајките како дел од европското наследство.
М-р Емилија Стефановска Давкова – директорката на НУУБ „Св. Климент Охридски“ – Битола, ја истакна важноста на зачувувањето на ромската култура и бајките како дел од европското наследство. Снежана Петровска – претставничката на Општина Битола, со гордост го изрази значењето на овој настан за културната размена и изградбата на поинклузивно општество.
Роналд Шункнехт – менаџер на проектот од НВО „Југендстил“, Германија, беше говорникот чија посветеност и лидерство во проектот овозможија создавање на европска платформа за ромските бајки. Изабел Јан – НВО „Контакти за Европа“, Германија, ги поттикна учесниците да ја ценат културната размена и меѓукултурниот дијалог. Беше презентирана и монографијата за ромски бајки и едукативните материјали за раскажувачи. Евангелија Мама, Викторија Михајловска, Анка Фотин, Силвија Строе, Угур Челик – претставниците од различни земји, ги споделија своите искуства и организирани настани за раскажување приказни во нивните заедници. Нивните говори донесоа нови перспективи и го открија значењето на приказните во современиот свет.
Следуваше доделувањето на награди и признанија на посветените учесници, како и незаборавно музичко затворање! „Огромна благодарност до сите партнери, поддржувачи и учесници што помогнаа да ја зачуваме магијата на раскажувањето! Овој настан покажа дека приказните не само што го носат нашето минато, туку и ја градат нашата иднина. Sasas Jekhvar Jekh. Once upon a time – and now“, беше истакнато на крај на настанот.
