Синоќа во преполната сала на Центарот за култура, музички спектакал во рамките на Интерфест, одржа пријателот на македонската песна, јапонскиот оперски првенец Казухиро Котецу. Салата беше исполнета до последно место, атмосферата преполна со емоции.
Котецу настапи во придружба на Камерниот оркестар на Битола, под диригентска палка на Владимир Димовски. Изведе Оперски арии, но вистинската кулминација се случи со извадбата на „Македонско девојче“, „Ако умрам ил загинам“, „Ако одам во Битола“.
На настанот свое обраќање имаше уметничката директорка на Фестивалот Милица Шперовиќ-Рибарски. Меѓу присутните беа јапонскиот амбасадор Оцука Казуја, министерката за култура Бисера Костадиновска-Стојчевска, градоначалникот Тони Коњановски и директорката на Центарот за култура Маја Андоновска Илијевски.
Министерката Бисера Костадиновска-Стојчевска истакна:
„ Со радост присуствував на еден од концертите на годинешното издание на „Интерфест“, концерт кој по својата уникатност ја привлече пошироката публика, не само од Битола, туку и од земјава. Големиот пријател на Битола, јапонскиот оперски првенец, Казухиро Котецу, кој настапува со Националната установа, Камерен оркестар-Битола, ни покажува колку цврсти и нерскинливи пријателства се градат преку уметноста и културата. Казухиро Котецу пред 10 години се вљубува во Битола, во македонската музика и оттогаш ја афирмира далеку, низ целиот свет. Тоа е големината и на сите музичари кои во изминативе 32 години настапуваат на „Интерфест“, кој прерасна во еден од заштитните знаци на нашата Битола. Деновиве преку „Интерфест“, Битола е место каде што се промовираат уметници од светот, но и место кое тие не го забораваат. Напротив, од овде се афирмира богатата и единствена музичка традиција на нашиот град, и држава. Ја поздравувам визионерската улога на идејните творци на „Интерфест“, Милица и Кирил Рибарски кои со голем професионализам и љубов се посветија на овој фестивал, кој го пораснаа во нашата Битола, која пак, достојно возвраќа, од година вгодина, со својата гостопримливост, култура, традиција и посебност“.
„Впечатоците се прекрасни за сите нас, а особено за паметење е изведбата на обработките на македонските песни: „Ако одам во Битола“, „Ако умрам ил загинам“ и други песни, кои ја отсликуваат македонската традиција. Денес, почитуваниот Казухиро Котецу, заедно со нашите организатори на „Интерфест“, Милица Шперовиќ Рибарски и Кирил Рибарски, гостуваа во Општина Битола, каде разговаравме за идните планови и соработка, во насока на понатамошна поддршка на културниот напредок на Битола“, истакна градоначалникот на општина Битола, Тони Коњановски.
Јапонскиот амбасадор Оцука Казуја за Тера телевизија рече:
„Ова е 32 издание на овој интернационален фестивал на класична музика и има прилично богата програма со разновидни изведби на интернационални изведувачи, но и изложби и поезија. Како голем љубител на класичната музика почестен сум што сум поканет да присуствувам и да уживам во овој настап и жал ми е што не можам да ја проследам целата програма поради обврските. Мило ми е што уметник од Јапонија, кој веќе има настапувано во Јапонската опера, исто така настапувал во Скопје пред неколку години, настапи и тука во Битола . Исто е интересно тоа што тој изведе јапонски и македонски песни“.
Котецу живее во Токио и настапува во тамошната опера. Но, во исто време, тој е голем вљубеник во македонската музичка традиција. Досега ги има обработено и песните: „Болен ми лежи Миле Поп Јорданов“, „Кога падна на Пирина“ , „Земјо македонска“ и други.
Љубовта на оперскиот музичар започна од гостувањата во Македонија во 2013 и 2014 та година.
32-рото издание на „Интерфест“ привлече гости од повеќе земји како Шпанија, Италија, Португалија, Украина и Австрија. Фестивалот е поддржан од Министерството за култура и Општина Битола.
