На платото пред Офицерски дом, започнa второто издание на фестивалот ЕХ, ТАА СЕРЕНАДА. Пробите со Камерниот оркестар на Битола кој во живо ги прати познатите македонски легенди и новите сили на македонската естрада кои беа селектирани на конкурс распишан за овој фестивал, поминаа во најдобар ред.
“Сите шеснаесет нумери се нови и авторски и тоа е значаен чекор во зачувувањето на традицијата на македонската музика, на серенадата и на традицијата која некогаш била присутна овде. Ќе ви подариме една прекрасна вечер каде ќе го вратиме сјајот на најопејаниот град, Битола.“ – истакна директорот на КИЦ Благојче Божиновски, пред почетокот на фестивалот.
Истиот има потенцијал да стане дел од концептот на градот Битола за интегрирање на културната и туристичката понуда.
“Вакви манифестации секако можат да придонесат кон туристичка промоција на Битола со цел да привлечеме поголем број на посетители, кои носат економски бенефит за битолското стопанство. Едно од нашите задолженија е тоа што работиме на туристичка промоција на Офицерскиот дом, негово подготвување за туристичка понуда и секако на кино „Манаки“. Овие активности траат веќе две години и зависат од одредени финансиски средства и одобрувања. Но, за овој фестивал културното наследство, архитектурата и духот на градот ќе ги употребиме како туристички атрибути и во иднина ќе го направиме прво регионален, а потоа и интернационален фестивал.“ – изјави на вчерашниот прес Тодор Ивановски од КИЦ Битола.
Настанот ќе го снима националниот сервис МТВ, а ќе се емитува дополнително.
“Подготвени сме, вечерва под ѕвезденото небо на платото на Офицерски дом да направиме настан кој ќе се памети. И настан кој продуцира нова македонска музика, непроценливо богатство за овие и за некои идни генерации. Оттука мисијата на овој фестивал е повеќе од значајна” – истакна Миодраг Неќак музички соработник на фестивалот.
Во продолжение неколку фотографии од пробите пред почетокот на фестивалот.
