„НЕБО“ е најновото видео на Александар Гулевски, инаку петта песна од неговиот албум во подготовка „НЕ“. Иако песната на прво слушање наликува на глам-поп балада, сепак, во неа и понатаму преовладуваат познати и проверени елементи на македонскиот dark wave звук. За разлика од неговата претходна песна „ДНО“, „НЕБО“ има помек, на моменти Боувиевски звук и Никкејвовска оркестрација.
Мистичните гитарски партии, овој пат се надополнети со текст, кој повикува на размислување и себе испитување. Во исто време текстот дава надеж, дека сепак постои излез од безизлезната емотивна и духовно болна состојба, во која се наоѓа современиот осамен и отфрлен човек. Александар Гулевски и во оваа песна користи минималистички пејачки фрази од источното црковно православно пеење и вешто ги спојува со својот особен и препознатлив музички израз.
„Благодарност до Сашо Миленковски, Владимир Симоновски и Атанасија Гулевска“, истакнува Александар. Песната е снимена во студио Црноризец Храбар во Битола, видеото е дело на Cottonbro Studio, мастеринг Waves.
