Претставата ,,Ако останеш дома” по режија на Јован Ристовски ќе биде изведена во Битолскиот театар на 31. Октомври, четврток и петок, 1. ноември од 20:00 часот. Станува збор за драма во еден чин по мотиви на Карој Сакони, во која главните улоги ги играат Јулијана Мирчевска и Васко Мавровски.
Се работи за секојдневна приказна во која ќе се препознаат млади брачни парови. Инспирацијата за претставата на режисерот му била секојдневието на обичните луѓе.
„Мојот впечаток е дека народот е несреќен повеќе од три децении без разлика која политичка партија е на власт. А сиромаштијата прави лоши состојби во духот кај еден човек. Во преставата мажот и жената се симболично во кафез и во публиката гледаат птици кои што го изгубиле духот и се птици што ја изгубиле сопствената музика“, вели режисерот Ристовски.
Сценографијата на претставата „Ако останеш дома” е на Валентин Светозарев, костимографијата на Благој Мицевски, а продукцијата е од сопствени средства на Битолскиот Народен театар.
