Џез музичарот Сашо Поповски неуморно го дава својот придонес за развојот на македонската џез-култура. Тој ја предводи катедрата за џез-музика на Универзитетот „Гоце Делчев“ (УГД) во Штип, паралелно, освен што работи на својот авторски материјал, ги врши и последните подготовки за интернационалниот фестивал „Џез-фабрика“, кој ќе се одржи од 7 до 9 јули во неговата родна Битола. Покрај тоа тука се многубројните настапи и концерти не само во Македонија, туку и надвор од државата. Една таква турнеја заврши неодамна и тоа турнејата во Шпанија, за промоција на албумот “Fallen Land” SJF Records.
„ Мојата прва турнеја во Шпанија се реализираше на покана на “Caja Granada Jazz Festival 2022” и џез асоцијацијата “OYK Association de Jazz de Granada”. Поради скратениот буџет на фестивалот и лимитираните можности за патување, не бев во можност да патувам со моето трио, па така оваа турнеја ја реализирав во состав со Dani Levy (Шпанија) бас гитара и Cote Calmet (Перу) тапани. Првиот концерт во организација на фестивалот се одржа во најпознатиот џез клуб во Гранада – Lemon Rock и веднаш уште следниот ден од страна на влијателниот џез портал Griffin Jazz – Granada добивме највисоки оценки за концертот со осебен акцент на квалитетот на композициите. Вториот концерт беше во соработка со културниот центар La Lolaina – Niguelas додека третиот концерт се одржа во најголемиот џез клуб во Шпанија Clarence Jazz Club – Malaga“, истакна Поповски.
Покрај концертите одржал и мастер час на кој прозвучија македонските песни.
„ Истиот беше на тема “Балканскиот ритам и џезот“ во организација на џез асоцијацијата “OYK Association de Jazz de Granada” каде зборував на Македонската традиционална музика и начинот на кој оваа традиција ја имплементирам при создавањето на современа џез музика. На мое огромно задоволство мастер класот беше одлично посетен и со членовите на асоцојацијата (музичари) научивме и изведовме две Македонски композиции „Елено ќерко“ и „Се посврши Сербес Донка“, додава Сашо.
За следната година веќе добил покана за настап на два џез фестивали во Шпанија.
Сашо Поповски има настапувано на многу џез фестивали во Европа и има работено со познати џез уметници меѓу кои Тони Китановски, Оскар Салас, Милчо Левиев, Дејв Вилсон и Гоце Мицанов. Во последната деценија Поповски објави пет албуми, соло композиции, а компонираше и музика за филм и театар. Неговиот трио проект е со Иван Бејков на контрабас и Виктор Филиповски на тапани. Во 2021 година, албумот Fallen Land заврши на прво место на регионалната џез сцена на шоуто Jazzolovka на ХРТ Хрватска и беше албум на неделата во Бугарија, Србија, Полска и Македонија.
Вели дека најголемо влијание во градењето на неговиот џез стил имал Орнет Колман и тој бран на авангардна музика од раните 60 ти години на минатиот век.Влијание имале и современите мајстори како Џон Аберкромби, Бил Фрисел или Рој Кембел Јуниор, артисти на чии албуми Поповски се навраќа и со задоволство ги слуша. За време на неговите студии работел под менторство на проф. Милчо Левиев и проф. Симеон Штерев, а денес дебатите за џез музика ги води најчесто со проф. Тони Китановски.
Повеќе информации за настапите на Сашо Поповски на веб страната:
За настапот во Шпанија на следниот линк:
