Од 23 до 29 април, Битола повторно ќе стане светска театарска сцена каде еден актер е доволен за да создаде цел универзум од емоции, приказни и трансформации. По повод одржувањето на 27. Интернационален фестивал на монодрама Битола кој оваа година се одржува под мотото „Огледало на вистината“, програмата беше претставена на средбата со медиумите.
На прес-конференцијата говореа директорот на НУ Центар за култура – Битола, Сашо Илковски, селекторот на фестивалот Благој Мицевски, Љупка Коларова Пајевиќ и Љупка Стефановска, додека за значењето на фестивалот и улогата на жири-комисијата се обрати и актерот Кире Ѓоревски, член на жирито.
„Битола повторно ќе биде место на средба на театарските гласови од светот – простор каде монодрамата ја потврдува својата суштинска моќ: да поставува прашања, да отвора дијалог и да ја одразува вистината на човекот и времето во кое живееме. Добредојдовте на 27. Интернационален фестивал на монодрама – Битола“, истакна директорот на Центарот за култура, м-р Сашо Илковски.
„Во време кога вештачката интелигенција стана наша вистина, кога ни треба малку време за да разбереме дали тоа што го слушаме, читаме или гледаме е нејзин плод или не, дали е вистина или е важно само добро да изгледа, ви посакувам да излезете од комфорот, да дојдете на претстава и да си дозволите да бидете вознемирени. Зашто, тоа е – вистината“, додава селекторот Благој Мицевски.
Жирито оваа година е составено од: Керолајн Бернс Кук, Анџелина Роска, Кире Ѓоревски.„Актерот ја оживува улогата и ја изнесува пред публиката, каде што се рушат сите бариери на премолчувањето, на идеалното, на најдоброто. Таму се отплеткува клопчето на вистината, која е сурово реална и не може а да не те допре. Оваа година, во Огледалото на вистината ќе се огледа секој – со својата убавина, среќа, болка, тага, но и со својата вистина“, рече м-р Љупка Стефановска, претседателка на Советот на фестивалот.
Со популарната претстава „Менопауза“ на Тијана Дапчевиќ, свечено ќе биде отворено 27. издание на Интернационалниот фестивал на монодрама во НУ Центар за култура – Битола, додека фестивалот ќе биде заокружен со изведбата на претставата „Гидионовиот јазол“- на Драмски театар од Скопје, на сцената на Народен театар Битола. Годинешното издание на фестивалот ќе донесе 13 монодрамски претстави од 10 држави: Ерменија, Полска, Литванија, Грузија, Киргистан, Шпанија, Казахстан, САД, Израел и Македонија. Во рамките на програмата ќе бидат изведени три македонски претстави, со што фестивалот продолжува да ја поддржува и афирмира домашната театарска продукција. Покрај официјалната натпреварувачка програма, фестивалот ќе понуди и OFF програма, која вклучува ретроспективна изложба „Лауреати на фестивалот“, за која изборот на фотографии го направи Љупка Коларова Пајевиќ, уличен перформанс „Статуи“ на Широк Сокак, како и неколку тематски работилници.
Со своето 27. издание, Интернационалниот фестивал на монодрама повторно ја позиционира Битола како значајна точка на театарската мапа, каде се среќаваат различни актерски поетики, сценски јазици и култури од целиот свет.
